ДЖЕОРГУЫБА

Ирон адæмы кадджындæр æмæ дзаджджындæр бæрæгбæттæй иу. Фæззæджы фæстаг мæйы æртыккаг хуыцаубоны райдайы æмæ ахæссы къуыри. Хуыцаубоны йæ райдайынц, галтæ чи фергæвды, уыдон. Уыцы бон хонгæ дæр кæнынц Галæргæвдæн хуыцаубон. Къуырисæры изæрæй та вæййы Уастырджимæ кувæн æхсæв, дыккаг хуыцаубоны – Уастырджийыл фæдзæхсæн бон æмæ йæ хæдфæстæ къуырисæры изæрæй – Джеоргуыбайы бæрæгбон æрвитæн æхсæв.

Къуырийы дæргъы ирон адæм фæбадынц бæрæгбоны фынгтыл, сæ кадджын уазджытæ вæййынц, семæ иннæ адæмтæй хæларæй чи цæры, уыдон дæр. Джеоргуыбайы хæдфæстæ фæуазалтæ кæны, æмæ адæмы 'хсæн баззад ахæм ныхас: «Джеоргуыба мын зæгъ, æмæ дын зымæг зæгъон».

Джеоргуыба рагон ирон бæрæгбон кæй у, уый бæрæг у, адæмон сфæлдыстады дæр ыл кæй æмбæлæм, уымæй. Фæлæ бæлвырд нæу, Уастырджиимæ йæ цæмæн бæттæм, уый. Уымæн æмæ йæ ном конд у чырыстон дины сыгъдæг уд хæстон лæг Георги æмæ гуырдзиаг дзырд «оба» – бæрæгбонæй. Джеорг (Георг) + уыба (оба) – Джеоргуыба. Йæ номыл гуырдзиаг æвзаджы, стæй чырыстон дины тæваг бæлвырдæй зыны. Бæрæг у, чырыстон дин Ирыстоны цы гуырдзиæгтæ – дины лæгтæ – парахат кодтой, уыдон зæрдиагæй кæй бакуыстой. Кæд раздæр ирæттæм ацы бæрæгбон Уастырджиимæ баст уыд, уæд сæ къухы бафтыд, йæ ном ын цæмæй ферох кодтаиккой, уый. Стæй ма Джеоргуыбайы фынгыл цæмæдæр гæсгæ дыккаг сидт вæййы Уастырджийы номыл, æртыккаг та – Джеоргуыбайы бæрæгбоны фæдыл. Иннæмæй та къуырийы дæргъы иронау кувынц Уастырджимæ, дзурынц, Хуыцауы разæй рараст, къуыри Иры зæххыл зилы, нæ куывдтытæ нын айс, зæгъгæ. Бæрæгбон æрвитæн æхсæв дæр та, Хуыцауы размæ сæ куывдтытимæ, курдиæттимæ, фæндараст кæнынц сыгъзæрин базыр Уастырджийы.

кæс «АРВЫ ДУАР»-Ы СÆРГÆНДТÆ